चितवन : चितवन–२ को उपनिर्वाचनमा आफ्नै पुरानो रेकर्ड ब्रेक गर्दै भारी मतान्तरसहित विजयी राष्ट्रिय स्वतन्त्र पार्टीका सभापतिसमेत रहेका रवि लामिछानेलाई निर्वाचित भएको प्रमाण पत्र प्रदान गरिएको छ ।
मुख्य निर्वाचन अधिकृत बासुदेव न्यौपानेले मतगणना स्थल औद्योगिक प्रदर्शनी केन्द्रमा निर्वाचित भएको प्रमाण पत्र प्रदान गरेका हुन् । यसअघिको आफनै रेकर्ड ब्रेक गर्दै लामिछाने ५४ हजार १७६ मतसहित भारी मतान्तरले विजयी भएका हुन् । लामिछानेले प्राप्त गरेको यो मत कूल खसेको सदर मतको ६९ प्रतिशत मत हो ।
मंसिर ४ मा सम्पन्न निर्वाचनमा पनि भारी मतान्तरले विजयी भएका लामिछानेले दोहोरो नागरिकता प्रयोग गरेको भन्दै अदालतले उनको सांसद पद खारेज गरिदिएपछि यहाँ उपनिर्वाचन भएको हो ।
